Samboçylaryň üstünligi
Sambo boýunça milli ýygyndy toparymyzyň türgenleri 15 — 16-njy awgustda Gyrgyz Respublikasynyň Çolpan-Ata şäherinde geçirilen Sambo boýunça dünýä kubogyna gatnaşdylar.
Sport sambosy we söweş sambosy nusgalary boýunça erkekleriň hem-de zenanlaryň arasynda geçirilen bäsleşiklere milli türgenlerimiziň 29-sy gatnaşdy.
Oýunlaryň birinji gününde sport sambosy boýunça erkekleriň arasynda guralan tutluşyklarda 58 kilogram agram derejesinde çykyş eden milli ýygyndy toparymyzyň türgeni Babamurat Baýramow özbegistanly türgen Munis Bahtiýorow bilen 3-nji orny paýlaşyp, bürünç medala, 71 kilogram agram derejesinde çykyş eden türgenimiz Kambar Umarow «FIAS 2» toparynyň türgeni Uladzislau Mardusewiç bilen 3-nji orny paýlaşyp, bürünç medala eýe boldy.
Ýaryşyň birinji gününde söweş sambosy boýunça erkekleriň arasynda guralan bäsleşiklerde 64 kilogram agram derejesinde çykyş eden milli türgenimiz Kerim Kerimow gazagystanly türgen Maratbek Rahmetullin bilen üçünji orny paýlaşyp, bürünç medala, 79 kilogram agram derejsinde çykyş eden milli türgenimiz Agasapar Muhadow gazagystanly türgen Bakyzhan Duisembekow bilen üçünji orny paýlaşyp, bürünç medala eýe boldy.
Ýaryşyň ikinji güni milli ýygyndy toparymyz üçin has-da ýeňişlere baý gün boldy. Onda sport sambosy boýunça erkekleriň arasynda guralan bäsleşiklerde 58 kilogram agram derejesinde çykyş eden Babamurat Baýramow özbegistanly türgen Munis Bahtiýorow bilen üçünji orny paýlaşyp, bürünç medaly, 64 kilogram agram derejsinde çykyş eden milli türgenimiz Niýazmyrat Babekow birinji orny — altyn medaly eýeledi.
Söweş sambosy boýunça erkekleriň arasynda guralan bäsleşiklerde 58 kilogram agram derejesinde çykyş eden milli türgenimiz Ýusup Taňryberdiýew 2-nji orny eýeläp — kümüş medal, 88 kilogram agram derejesinde çykyş eden milli türgenimiz Maksat Annagylyjow gazagystanly türgen Tanirbergen Tergeubekow bilen üçünji orny paýlaşyp, bürünç medal gazandy.
Ýaryşyň ikinji güni söweş sambosy boýunça çykyş eden zenan türgenlerimiz üçin hem ýeňişleri getiren gün boldy. Onda 54 kilogram agram derejsinde çykyş eden milli türgenimiz Zarina Abdyrahmanowa ikinji orny — kümüş medaly, 72 kilogram agram derejesinde çykyş eden milli türgenimiz Gülzada Jorakulyýewa ysraýylly türgen zenan Nisimian Şaked bilen üçünji orny paýlaşyp, bürünç medaly eýeledi.
Metbugat maglumatlary esasynda taýýarlan
Mamagül JORAÝEWA,
Türkmen döwlet bedenterbiýe we
sport institutynyň talyby.
